Օրերս Հայաստանի ազգային  արխիվի անձնական արխիվային ֆոնդերի ստվար ցանկը համալրվեց  ևս մեկով: Ամերիկաբնակ  Կարպիս Ֆեսչյանը նվիրատվությամբ ազգային արխիվին է հանձնել  իր ստեղծագործական 40 տարիները լուսաբանող փաստաթղթերը, որոնք հայկական թատերարվեստին անմնացորդ  նվիրումի վկայագրեր են: Կարպիս  Օննիկի Ֆեսչյանը  դեռևս 1948 թ. ընտանիքով  ներգաղթել է Հայաստան` Ռումինիայի Կոստանցա քաղաքից: Միջնակարգ և բարձրագույն  կրթությունը ստանալով Երևանում` նա աշխատել է Գորիսի, Կամոյի պետական թատրոններում, Երևանի  երաժշտական կոմեդիայի , Հովհ. Թումանյանի անվան տիկնիկային  թատրոններում Համամիութենական և հանրապետական փառատոների բազմակի դափնեկիր և ոսկե մեդալակիր, Ֆեսչյանը պարգևատրվել է «Բարեկամության» շքանշանով, «Արիության» և ԽՍՀՄ ՅՏՆՑ-ի կրկնակի ոսկե մեդալներով: 1990 թ. Կ. Ֆեսչյանն ընտանիքով  արտագաղթել է Միացյալ Նահանգներ: Սկզբում  հաստատվելով Բոստոնում` նա ղեկավարում է «Համազգայինի» թատերախումբը, ապա տեղափոխվելով Լոս-Անջելես, մինչև օրս նա ղեկավարում է իր թատերախումբը: Կ. Ֆեսչյանը, բացի ռեժիսորությունից, զբաղվել է և զբաղվում է մանկավարժությամբ: ՀԱԱ ի պահ տված փաստաթղթերը հիմնականում լուսանկարներ և հանրապետական  և սփյուռքի հայկական մամուլում լույս  տեսած հոդվածներ, արտացոլում են հարուստ ավանդույթներ  ունեցող հայկական թատերարվեստի որոշակի ժամանակաշրջանը: Հաշվի առնելով փաստաթղթերի բնույթը`  դրանք  կպահպանվեն  ՀԱԱ կինոֆոտոֆոնո և ապահովագրական պատճենների մասնաճյուղում: Հայաստանի ազգային արխիվը բարձր է գնահատում Կարպիս Ֆեսչյանի  այս քայլը և հույս է հայտնում, որ նրա օրինակին կհետևեն աշխարհի  տարբեր երկրներում ապրող և ստեղծագործող  հայորդիները: