2008 թվականի մարտի 26-ին ՀԱԱ ցուցասրահում բացվեց «Թովիչ մեղեդիների վարպետը» խորագիրը կրող ցուցահանդեսը՝ նվիրված հայ ականավոր երգահան Արմեն Տիգրանյանին եւ նրա անմահ «Անուշ» օպերային: 
Ցուցահանդեսի բացման հանդիսավոր արարողությանը ներկա էին երգահանի թոռը՝ Արմեն Տիգրանյան կրտսերը, արվեստագետներ, երաժշտագետներ, արխիվագետներ, հանրապետության Զլմ-ների ներկայացուցիչներ: Բացման խոսքում ՀԱԱ տնօրեն Ամատունի Վիրաբյանը ընդգծեց այն մեծ ավանդը, որ ունեցել են Արմեն եւ Վարդան Տիգրանյանները հայ երաժշտական արվեստի զարգացման գործում:Ցուցասրահում ներկայացված ամենատարբեր բնույթի փաստաթղթերը՝ նոտարագրությունները , 
նամակները, բեմադրությունների ազդագրերը, հանրապետական եւ արտերկրի մամուլում լույս տեսած հոդվածները, կարծիքները, տպավորությունները, պաշտոնական հրավերները, լուսանկարները գրավել էին այցելուների ուշադրությունը: Ցուցահանդեսի նկատմամբ ընդգծված հետաքրքրությունը պայմանավորված էր կազմակերպիչների մտահղացմամբ՝ ներկայացնել Տիգրանյանների տաղանդաշատ գերդաստանի նաեւ մյուս անդամներին՝ Ա. Տիգրանյանի զավակներից Վարդան Տիգրանյանին՝ երգահան, էդմոնդ Տիգրանյանին ՝ ճարտարապետ, վաղամեռիկ եղբորը՝ Հայկ Տիգրանյանին՝ խոստումնալից նկարիչ:
< կարդալ բոլորը